Id wekwos Deskromans kyeust ia medieval romans qua narre ia aventures iom ritters os Roy Arthur. Sont kalen kathalika arthurska romans (includent-ya id cycle ios Graal) wa breithen romans
Picture (circum 1406) ex id Lancelot-Graal, quer Roy Arthur ed eys ritters, seddend claus id Desko kay celebre Penkwost, hant un vision ios Saint Graal.
id Desk ed id invention os roman[]
Id Desk prehpt ye id prest ker in id Roman de Brut (1155) ab iom anglo-normand cleric Wace. In sien legendaro chronique iom roys os Grand Britain, Wace evoquet id creation, ab roy Arthur, uns desk claus-yod poitte sessum tik eys gohdst ritters, aun aurdhen os preceddence. Nu-vaht Chrétien de Troyes buwes, ka prest, id Desk id structurant quader uns druve-ye romanlik wehrg, focust ep Arthurs curt ed ia wirts id incarnet : rittersk kyudos ed curtesia.
Id Gundestrup kattil est un 69cm weur ed 42cm hog riche-ye ornen argwrnten kattil ex id La Tène-tid (V-I secules pre JC). Buit trohven in 1891 in Raevemose, un torfmoor prokwem Gundestrup in Jutland, Danmark. Id scene uber dexi deict un seddend krent person ops identifien ei celtic div Cernunnos, quom sems aynt iom precursor os Merlin iom Enchanter. In id celtic mythologia, id "magic" kattil ghehdt, sekwent legends, dahe pitu pro tusent menscen, kam id pohltoskattil ios Dagda, we dahe wiswenweida ad quel geust ex ids mathmoun weti scrisces mortus. Id Saint Graal os Roy Arthur est neid alyo quem un christianiset kip ios kattil os pohltos au weida.
Uno multiple symbolique[]
Bi Wace, id evocation ios Desk eet un weidos kay spehrde id prestigieus model om Charlemagne ed eys dwodem pars. Bi Chrétien, id Desk est khaliban honorific, symbol ios bayghen do id elite os ritterdem. Ye id XIIIt secule, un christian interpretation biht proposen : in id Quête du Saint-Graal, id Desko skeipt id mund; instituen ab Merlin, est id trito table pos tod ios Senstios Dorkwios (os Jesus Christ), ed tod ios Saint-Graal, mysterieus item os celtic origin biht, in ia textes pos Chrétien de Troyes, id coup quodwert kwahsit id cruor ios Christ kata id cruce. Ex politic ed curtese, id Desk hassilet it un cosmic ed religieus maynen. Claus id wehst id Perileuso Sedd, ep-yod maghsiet sessum tik tienxia gohdst ed pursto ritter (Galahad, son os Lancelot). Ia places claus id Desko sont in variable numer, potential-ye tem aunnumer quem ia-pet aventures.
Id Lia Fàil (gaelic : "Lewank Fatalitats") est un petra ep id clin os Teamhair/Tara in id Medio Penkwdel (Mì/Meath), dieugh-yod ka cronenspetra pro iens Wardhroys Erins. Id Lia Fàil eet ayt magic : quan is legitim Wardhroy Erins eedeht sien ped protiev id, tunwert id petra eebaupt ob joy. Kad hant ia celtic iser lewanks inspiren id "Perileuso Sedd" ios Desk. (photographia ab Duncan J. Johnson)
Ies Deskritters : un ghyanen liste[]
Wace ed Chrétien hieb dught plur listes iom Deskritters. Tod daftart it, sekwent ia textes, semens meis au minter gnoht ritters : Gawain, nepot ios roy, Cai iom senschalk, Yvain, Lancelot, Perceval, Galahad edschi Galeris, Bors... Quayque sehkwnt ia arthursk wirts qua sont supposti defende, toy heroys, nett-ye individualisen, ne sont faylfred. Cai, churlilehger, biht ops vict unte katus; Gawain est frequent-ye presenten ka un galant.
Perceval bei reclusorium, picture ex un XVt secule kawu ios Conte du Graal.
Un jor skoip id Desk[]
Sammel clus ed ghyant, it kwehct id jor iom arthursken romans. Id fin ios regne os Arthur esend proe-planen, ia ulteriora romans antslehnke in ia interstices iom prevers, kweter leit de parduce id storia ios Graal (mweyssui in id Conte du Graal ab Chrétien), de evoque tuntro secundar persons, we de narre id miegve iom heroys.
In-kap id XIIIt secule, id Merlin (roman yando anadeht ad Robert de Boron) enscenet Merlin, person samt supernatural maghs, radher os Arthurs pater, ed qui act un essential rol pro id adgumt os Roy Arthur ed ios Desk. Ye id sam zaman, quar Continuations in stiches lehge na Chrétiens texte, focusend-ye ep iens persons Gawain ed Perceval. Ia megil prosencycles ios XIIIt secule antplehce id storia os Lancelot (id baygh long Lancelot en prose [1215-1235] endt med La Quête du Saint-Graal ed La Mort le Roi Artu) au os Tristan, integret do id arthursk mund. Nov persons bihnt ies heroys om yando sema meis scharir (Le Bel Inconnu), hatta parodic romans.
Ia Deskromans hant gnohn un immense success. Tarjen ed imiten in Europe, evolvent kyid ritterdem roman ye id end os Mediev. Discreditisen unte id Renaissance, gwehment tsay do honor unte id XIXt secule med id romantisme.