FANDOM


Id lexis individu maynt "indivisible" (ex latin). Witerom ia collective entitats (churd, classe, societat), el individu kweit ob id fact od els elements khake bihe dissocyen ud mutu aun destruge el, we bariem aun abolihes id maynen tom elements - sam-ye kam un organ rohft ex un gwiv leust sammel sien function. Moderne ed muassir men daumt minter del individu quem de individualisme : sei tod emancipet el mensc ud collective dwineghs, kwe id ne est sem forme os egoisme eti os narkisisme ?

C97W25A










Ia suedsa'l individu : unitat ed unicitatEdit

Cada individu est druve-ye "oin", menxu un collective entitat est ithan tik analogic-ye im individus (mathalan, "France" au "Espania"). Is deutsch philosoph Leibniz (1646-1716) deduxit ex to od tik existent, honeste-ye sayct, i individus.

Sei cada individu est "oin", est kathalika "unique", quo ne maynt id sam, kam to biht suaviden kun id probleme ios rect im individus est posen. Idghi eiskwen ab cadanghen ios respect os elso salvtato dehlct ghehlde pro vasyens individus. Defende oin individu ka talg, to est defende vasyens, in tod sense od ielg individu, contend ka "oin", ghehldt kam alyis, quo est id dastur os egalitat in democratia. Punor, iskwes bihe recognihnis in sien "unicitat" est iskwes un "rect ad difference".

Tod double criterium om unitat ed unicitato tant-ye difficileiht ia werds iskwn ab id notion "individu" : ia problemes om individuation, individualitat ed individualisme.

Keane - Everybody's Changing (Alternate Version)

Keane - Everybody's Changing (Alternate Version)


Id individuationsprincipeEdit

"Individuation" tehrpt bihe awiet ne tik-ye ka quo beuwt sem individu un individu (els unitat), sontern kathalika quo beuwt od el est solg individu ed ne talg alyis (els unicitat). Sei est ver od existent tik individus, id gnohsa os individuation kwecto yed dehlct ses quanten importantst, tem quem clarst, quodghi nos permitt nake id ses in se, instet nos formehne do abstractions.

Api id philosophia os Aristoteles (384-322 pre JC) nos lehrt od tod gnohsa est impossible, ob idpet fact ios double naudh om unitat ed unicitat. Sekwent iom, cada individual realitat se compont ex forme ed material. Mathalan, is individu quos wi nam est Socrates posseddt un forme, quod permitt tolke de iom aum-ye - is est un wir, un philosoph, est prabh, courageus... - ed uno materia quosmed is ghehdt se enderkwites ud qui hant id sam forme quem is. Quosmed tyehct id individuation os Socrates ? Med id forme, eighi is deulct sien unicitat, id indefinible "semjecto" quod pliehct kem is biht recognihn. Ed dat bo wehse necessar-ye in wiswem individu, id abveicen inter individuationo med forme ed individuationo med material est irreductible : est neid wahid antwehrd ei mysterium os individuation. In Mediev, id opposition inter forme ed materia, heritet ex Aristoteles, nadominet ia paurskens de id individuationsprincipe.

Ye id XVIIt secule, in ia philosophias om Spinoza ed Leibniz bihnt nova vias exploret. Sigwrnd-ye men, in sien Ethique (1675), od "cada jecto tem se strehnct ad persevere in sien ses quem tod est in cid", ed seulend-ye tod essential these ep id logic impossibilitat ios destruction ab seswo, Spinoza inscript inkaptos individuation in id kerd ios ses, ne kam uno mysterium, sontern witerom kam un dastur os intellectibilitat. Leibniz de sigwrt in sieno Monadologia (1714) od realitat est oiskipen ab "monades" (ex hellen μονάς = "unitat). Ielg monade antplehct spontan-ye sien suedsa sekwent un specific loy, ed est impossible od dwo monades sont mutlak ne-enderkweitet ud mutu.

Alice

















Id recognition os individualitatEdit

Sei id probleme os individuation concernt vasyens sesens, id notion "individualitat" est specific-ye im menscims. Est rhayr-kafi ses un individualitat kay "bevide" individualitat, todghi dehlct "se pruves" kay bihe recogniht. Aun tod effort kye recognition, menscexistence est tod em individus aun individualitat : est cadadien trivialitat, describen ab philosoph Heidegger, in eys wehrg Ses ed Wakt (1927), kam submiss ei augos ios "anghen", evincend id "ego" : cadanghen act kam "anghen" act, judcet kam "anghen" judcet, critiquet kam "anghen" critiquet. Tod dictature ios "anghen" est diwiden, sekwent Heidegger, id fact od id ses al mensc est un "Ses kyid mohrt". Mohrt skeipt, pro cadanghen, id impossibilitat os antplehce sakwn-ye sien quant possibilitats, id naudh os se riske, os sacrifie quo el maghiet ses pro quo el hat chosen ses. Lakin tehrpt el ghabe sieno mohrt, ne sekwent id banalitat ios "anghen mehrt", sontern kamghi "sien wist possibilitat".

Tod intim diemen, inter mohrt ed individualitat, est ja uno major theme ios wehrg os Hegel (1770-1831). Hassa in sien philosophia os historia deict senter id importance os individualitat, besonters in sien analyse ios essential rol agen ab "megil wirs". Toy (Alexander, Cesar, Napoleon...) sont megil ob historia, ed ne ob id presence in iens om universal menscqualitats, kam est id fall pro megil mualims au scriptors. Sekwent Hegel, id megdos uns "megil wir" dependt wahid-ye id fact od so parkwehrt aun reserve sien function eni historia, ed possibleiht, med sien gwaukan action, id necessar mutation ex un zaman do alyo. To, tik un individu, ka individu, ghehdt kwehre to, treusend-ye tik seswo, dehnd-ye sien hol passion ad nake id ziel quod ei est wi, se sehkweihnd-ye ab quanti prekheisse instinctive-ye is est id instrument os meinyun. Seighi individualitat est necessar ad historia, est ithan tik ka instrument, zariya, quod historia sacrifiet pos neudus id : megil wirs rar-ye mehrnt in iro crovat. Individualitat est also pro Hegel tik oino moment, albatt essential, bet bestohmen ad bihe kardeht.

Ale punor individualitat do absolut, solg est id deursia os Stirner in Der Einzige und sein Eigentum (El Unique ed elso Suedos) (1845), druv "bible" os anarchism. Ielg em nos, sigwrt is, est un "Unique", bet ielg em nos alienet-se ye id nam om pseudo-universal entitats ("Mensc", "Religion", "Stat"). Od el individu retrehft id sense os sien inalienable individualitat, od mensci recogneihnt mutu ka incomparable, est id condition kay gnahnt druve-ye pacificiet menscsibias lurt ud id violence quod gehne inexorable-ye nies comparations. Id critique contra Hegel est dar acuter in id wehrg os Kierkegaard (1813-1855). Sekwent iom, id pretention ios abstract mentor os "upermehne" individualitat, os integre id do sien systeme, deict tik od, pelu memehnus-ye, is abstract mentor hat myohrsen od nies condition - tem quem eyso - est tehrbe "existe".

Jean Schultheis - Confidence pour confidence REMASTERISE

Jean Schultheis - Confidence pour confidence REMASTERISE


Individualisme ed egoismeEdit

Cadadien bahmen confundt ops individualisme ed egoisme. Tod confusion tehrpt bihe denuncen, ar baygh rigorous-ye, id fact os milite pro el individu, yani cada individu ka solg, neter impliet, meg witerom, od anghen meidskwt alters binisbat se, ni od se meilskwt meis quem alters. Id contrar os egoisme est altruism, menxu id contrar os individualisme ghehdt ses namen holism (ex hellen όλος = hol), sekwent un opposition exbohrn ab sociology L.Dumont (1911-1998). Api, ne est evident od id submission al individu ei communitat favoriset els bayghti dia alyanghen. Est suaviden, punor, kam id ghehdt favorise gruppegoisme todghi submission beuwt id communitat el druv "individu".

George Michael - As

George Michael - As









Individualisme ed entreprise spiritEdit

In un serie om essais de id gnahsa os englisch politic liberalism, C.B. Macpherson (1911-1987) introduct id notion os "possessive individualisme" : it biht trohven bi Locke id theoria uns illimiten vetatsrect (secondo Tractato de id Civil Gouvernement, 1690).

Maghmos lakin daume con Marx (1818-1883) an vetatsrect ne est un rect ad egoisme ed un gheigtel pro id exploitation os menscorbat ab qui xeihnt ia productionszariyas. Liberal men sigwrt witerom od id paursken ab cadanghen os sien wi interesse contribuet quanten sellt : est id maschour theoria ios invisible hand.

Neti leit nundiens de oppones ia successa os leudher entreprise ibs deuysens ed menscencost iom planeneconomias, bet sei quanti samstehme de vide in id lure al entrepreneur un factor om creativitat ed dynamisme, ia economic ed financial crises deikent kathalika id naudh uns regulation uns Capitalisme kalt wild ed uns bespehcen iom social fractures. Ne hat solidaritato tant-ye meis wirt obghi gwehmt ex leudher individus ?

Herd










Hat el individu un wirt quod al est wi ?Edit

Iskwes id werd ios sul ios invididuwirt est kam paurske an el individu aygwt un wi, natural ed transcendant wirt, quod vaht se impones per se ad alyanghen. Id werd est tant-ye delicater obghi id wirt al individu ghehdt depende id chust kweiten : id economic wirt al Mensc ye id marxiste maynen niet ses id sam quem els wirt ye id diksmaynen, ni hatta quem els religieu wirt (besonters pon id Reformation). Est kathalika possible kwenchaue id wirt al individu plauter sekwent els imkan om influence, potential ed leudher action.

Lakin, biht constatet nundiens un crise iom democratic wirts, iom traditional wirts al Mensc, ye id brungos uns effective staurerascen al individu ka wirt, quod gwehmt ka partial au total substitution iom prever wirts. Yed, mides alter wirts med id alsen tos al individu ghehdiet duce do un subjectivisme ed un relativisme qua destrugient idpet kehnsen os wirt, wawod neideti ex ia ghehldiet universal-ye.

DSC 0358














In id Ere du Vide (Era os Kenos) (1983), Gilles Lipovetsky denuncit ithan id entren do un posmoderne era in quod individualisme assuriet nuntos id refuse os cada transcendence ed id narkisisme im individus. Marcel Gauchet, in id Désenchantement du Monde (1985), hat nastohmto nieber theses.

Historic-ye, ia individualiste idees hant prohpen in id europay men in id druna ios XVIIt secule. Senter kwehct favorisevs id emergence om democratic politic forms qua challenger ia ancian hierarchias ed uns economia quod ijieb un importanter rol ei mercat ed ei entreprise spirit. Eti, individualisme hat tadrijan darmerasct per siena manifestations in id cadadien, besonters id consummsocietat, id orbatsmund, id politic gwit, id gwitstandard, sexualitat....

Ex ia libertar "mathals" os Mai 1968 do id raunstehgen os economic liberalism unte ia 1980tias (samt id gumt do magh as Margaret Thatcher in id Uniet Roydem ed os Ronald Reagan in ia Uniet Stats os America) ed unte ia collapses iom socialisten societats in-kap ia 1990tias, un akster vol os rumpes ud ia divers forms om dwineghs ed politic ideologias hat tadrijan prohpen.

8674296 f1024


Iaghi traditional wirts hant entren crise. Politique, preter, wawod id communitat hat slaberascen ye id brungos al individu, quel se desinteresset ud public re. Tocqueville kieusit od individualisme est un bemohnen ed enpace sentiment quod daht ielgi civ id menos om se isole ud id masse em sien samliks ed sgwehme apank con sien familia ed sien prients; yoitkwe, pos creevs it sib un lyter societat pro sieno neud, el linkwt libter id meger societat eiswo.

Sam-ye, biht prispohct un destruction os culture ye ids authentic maynen. Biht uperlit, sekwent sems, "ex culture do barbaria" : el individu ed elso libitum prehpe ka id ultim instance quer id culture uns democratic societat emt raudh. Sei sems kwahnt ter un dynamique os solidar emancipation ud ia wirts os modernitat, maungi sigwrnt leit ter de un destruction os culture ka human wirt, idghi cheus biht promoto do wirt, independent-ye dia sien relevance.

Community content is available under CC-BY-SA unless otherwise noted.