Kartvelia

Kartvelia [[Image:|97px|border]]

Kartvelia (kartvel : საქართველო, IPA : [sɑkʰɑrtʰvɛlɔ]) est un Stat lyehgend in Cavcase ana id eust ios Kyehrsen Mar. Tbilissi est ids nagor ed ids mierst urb. 3,6 millions leuden gwiveer in 2024 in Kartvelia (mustathna Abkhasia ed Sud-Iristan). Kartvel est ids official bahsa ed id lari ids official rawaj. Kartvelia est unum unitar, semi-presidential respublic, samt un gouvernement elect per un representative democratia.

Abkhasia ed Sud-Iristan sont official-ye parts Kartvelias, bet se bo aynt independent Stats, ed sont de facto supodeht ei Russian Federation

Difficil relations con Russia

Kartvelia est ayt un perodhkala os Occident esdi buit waldhen ab Pars tiel 1783 kun buit annex ab id Russian Empire ed ne bihsit independent pre id fin ios Soviet Union. Pos id "Rosenrevolution" os 2003 ed ids ghyahsa kyid Occident, id land buit destabiliset ab dwo separatiste regions (Sud-Iristan ed Abkhasia) stohmen ab Russia.

In 2006, ia sibias inter bo lands hant-se irremediable-ye deterioret : russiano embargo contra kartvel products, expulsion statanen ed doublen ios gaspris. In Augusto 2008, Kartvelia hat lancet un offensive in Sud-Iristan, quo Moskva brugit kay yises tetro tanks. Id kartvel armee buit enkasret pos penk diens katu. Troubles udbrohgeer kathalika in Abkhasia. Ia kartvel autoritats, qua mohn ghehde tyices pressem per un veto contra un Russia-entren do id Muntorganisation, hant dohlgen fortrage ira trupps. Katha, id hat sist Russia recognihes id independence om sien dwo rebell provinces ed occupe id plor, beghseihnd id ithan takriban 1/5 idsios territorium. Sud-Iristan solliet vijoine Nord-Iristan edghi integre id Russian Federation. Tod intensifiet sien presence in bo respublics bet hat khaken vergihes od, in December 2008, Kartvelia widihsit id principe sienios NATO-preadhesion. Id desastreus weir os 2008 hat kathalika haben dikspolitic consequences : ia constitutional maghs os president Saakaschvili amtirevs ex 2004 do 2013 buir limitet sekwos affaires om nepotisme ed corruption. In 2024, id (contestet) parlamentar sigh uns pro-Putin partise hat provoquen enorma straddemonstrations ed piernihn tod land ud id Europay Union ed id NATO.